Eafüdda Dog

In da Frua um hoiwa neine noch ana lausichn Nochd
hod eam dOide kebblad aussekaudn ausn Dembl.

Dsmiddog um dswöfe bari Nochrichdn hod a s neman plerradn Gschroppn
eeskoid und grinsad mid ana rosdichn Hoggn daschlogn.

An Nochmiddog hod se dea Drankla fulla Wödschmeads
mit dsen Kriagln ban Wiggal in da Öweingossn nidagsoffn.

An Ownd is a mid fü Glik da Bolende
duachs Köllafensda in ledsda Segundn auskumman.

In da Nochd is a donn ois Geisdafoara fui in Ö
ubremsd und a wida grinsad in an Feanlasdla einedunnad

Gsunda Abedid

I iß ois, hod a gonds schduids xog,
wia dGechin eam gfrog hod,
obarana fa da haglichn Soaddn is.
Des hod a jedsa dafo
fo sein Kuidompf, dea Wabbla!
Do hods as Golestarin
uandlich aufegschnoidsd,
und dLewaweadde
hom farugd gschbüd,
so guad hom eam dSchdödsn
und dHoiwn gschmeggd.  
S ged hoid nix iwaran
gsundn Abbedid.

Dram

No amoi heid Nochd
mechd i dsruggfoin in Dram,
Wäu nua mea ba dia
bin i wiaglich daham.

Moidseid

Wiaras ledsde Moi a Schnidsl
mid an Eadebflsolod gmamfd hod,
wuida si scho bara Sau bedongn,
fa dera s Fleisch gwesn is,
so guad hods eam gschmeggd.
Hom mia Menschn a Gligg,
kummds eam af amoi,
daß ned umkead is af dera Wöd
und dSchweindln ned unsaran
ois Fleischlifarandn hoidn.
Wos hod se da Heagod eigandlich dengd,
wiara dMenschn daschoffn hod?

S Gdichdl

Du kenndasd, wonnsd wuidasd,
aus jedn Sods, densd heasd, a Gdichdl mochn.
Du brauchasd nua, wia barana Bealkeddn,
Woad fia Woad gonds dsoad
af an rodn Fodn affadln –
du muaßd nua in dei Heads einehean.

Nocha is ma imma gscheida

Wias eam in foischn Fuaß ognumman hom,
woara gonds schen saua und hod se beschwead.
Daß a mid seina Boflarei seiddn fuchdsandn Lewnsjoa
se söwa hiandebbad in den Schlamassl einegriddn hod,
is eam easchd in Schdeawedsimma kumman.

Fuadschrid

Wonn friara ana dGuscha dsweid aufgrissn hod,
hod eam sei Oida midn Oxndsibf a uandliche iwadsogn.
Wonnsd heid dsu so an Dilo wos sogsd,
hengd a da glei a Goschn o – und du hosd dFiasoag an Hois.
Friara hod ana bara Wiadshausrafarei hegsdns a boa Dsend faluan
odara uandlichs Loch in Schedl kob.
Heiddsudog schmeißd a se wos ei und wiggld noch da Disgo
sein Bolidn gonds geil um an Dswedschgnbam.

D’Wochdlkenich

Loß mi jo mid deine Schbinnarein
fa dera Widagebuadsgschichd in Rua!
Glabsd fülleichd, i wuidad in fümfhundad Joa
ois Adaxl oda ois Wochdlkenich
no amoi af dera Wöd manondagräun?
Do bleib i liawa gadulisch –
a wonns ma d’ewiche Sölichkeid kosd.

Nua ka Weiwawiadschofd

Ois Muhamedana kennd ma,
how i ghead, wonn mas bassnde Geaschdl hedd,
fia so Weiwa gleichdseidich hobm.
Des hedd ma fui daugd,
und i hob mi scho ois glanan Bascha gsegn
middn unda de fia feschn Kodsn.
Owa wonn i donn drou deng,
wia ma scho mei ane Oide
iwan Kopf gwoxn is,
do wari uandlich ogschidd
mid so an Harem fulla kebblada Weiwa.

Kriag

Du kenndasd, wonnsd wuidasd,
aus jedn Woad a schens Gdichtl mochn.
Wia wüsdn du Wabbla aus KRIAG oda HUNGA
a boa Fersaln mochn, de ins Gmiad gengan?
Baß auf und hea dsua: Ausn KRIAG loßd si
a gonds a geiles Gdichtl mochn:
Wos is, Fanni, wonn KRIAG i fa dia
a schens Bussl?
Und wos is midn Hunga?
Geduid, Geduid: I bin jo midn Bussln no ned feadich!

Kaisa, König. Edelmou

Kaisa, König, Edelmou:
amoi  kummt a jeda drou.
Haßt a Ösna oder Flick:
auf sou mounchn woat´ da Schtrick.
Souloung mas Lebm net kafn kou,
is a da Gschtoupfti nua a oama Mou.
Ea kou sein Flieda oin vagessn,
sogoa des guidne Glopapia.
mia glanan Leit, mia hobm des bessa,
und rutschn leicht duach d´ Himmlstia.

Aufnahmeprüfung

Kandidat A: I hob mei Kind datränkt und vabrennt.
Teufel: Aufnahmsprüfung bestanden.
Kandidat B: I hob des vadoummte Mensch an die Wound pickt,
bis sie sich neama griat hot.
Teufel: Aufnahmsprüfung bestanden.
Kandidat C:  I hob mei Schwesta hamdraht, wäu sie sich hot vergewoitgn lossn.
Teufel: Aufnahmsprüfung bestanden.
Kandidat D: I hob ois Direkta mei Bank um a poa hundat Mülliounan ogschtiat.
Teufel: Du net! Fia di is a Louschnplotz in Himml resavieat. Da Judas woatat schou auf di.
Ban Göd heat si da Gschpaß auf. Do kennan mia in da Hö kan Pardou.

Nix is lous in Heanagschrah

Wiasou schreibst net, wos si vua deine Augn in Heanagschra oschpüt,
wounnst in da Schui an Aufsotz ibas Oitogslebm schreibn suist?
Is des vülleicht sche, wos du do vo dia gibst: „Nachdem wir nach dem Fußballspiel vom Fußballplatz nach Hause gingen, trafen wir Herrn Bürgermeister Katzenschlager, der gerade seinen Dackel namens Fredi äußerln führte. Meine Eltern begrüßten ihn respektvoll und wechselten ein paar Worte mit ihm. Dann setzten wir unseren Weg fort.”
Des is jo ois schteif wiara Huizfuaß. Wos leantsn ia eigantlch in das Schui?
Moch afoch die Augn auf, dounn brauchst da nix aus da Nosn ziagn und sou an Schtiefl zoummschreibm.
Schreib afoch,
wia die Beirin bara Tia aussakumman is,
Wias aufn Heanadreck ausgrutscht is,
wia si da Houfhund geschreckt hot und auf d´Schtroßn glafn is,
wia da Motoaradlfoara eam ibafoan hot.
Oba des is jo nou net ois gwesn: Glick in Unglick hots gebn:
Wias den Motoaradlfoara zbreslt hot,
is aus seina Briaftoschn a gounzes Packl Hundata aussagflougn.
Do hot a jeda wos ghobt davo:
Da Bauer wos zun Lochn, wias sei Oide higschtrat hot.
Da Motoaradlfoara, daß a mit a poa Brich davoukumman is,
des Rote Kreiz, daß wiera an Transpuat ghobt hom,
Da Feal, da Knecht, daß a si jetzt jedn Tog niedasaufn kau.
Nua da Hund hot hoit a schlechts Joa dawischt.
Sigst, Franzi, des wa hoit a echte Gschicht, diarekt ausn Lebem griffn.
Oba zum Glick muaß i jo kane Aufsetz mea schreibm.

Hosd Dseid?

A dswischn Diar und Ongl
konnsd a boa Fersaln mochn,
wonn dOma no amoi schnö aufs Heisl muaß,
wonn dKods unbeding no wos dsun Fressn wü
und da kidslad um dFiaß schmiad,
wonn dsua Undseid s Dölöfon leid
und n Foda da Dschigg aus da Babbn foid.
So fü Dseid muaß sei.

S’ledsde Woad

Mid jedn Sods, densd sogsd,
kenndasd dein ledsdn Sods gsog hom.
Drum baß auf, wosd sogsd,
wäu mid jedn Sods, densd sogsd,

kenndasd dein ledsdn Sods gsog hom.

Dsukumfdsaussichdn

Ban easchdn Bruch
hod a se fosd ogschissn.
Nochn dsweidn Bruch
homs eam eignad.
Ba sein easchdn Freigong
hod a se a geile Kods aufgrissn
mid dera ea noch an Bankibafoi
noch Brasülien oboschd is.
Wia da gondse Rubl fabrassd woa,
hod eam dBraud schdandabbe fabfiffn.
Jedsa bfeifda r a in Hefn ausn ledsdn Loch.
Fülleichd kummd a noch dsen Joa Sagglbiggn
ois Schaffea barana Buinbande unda.

Duaschd

De Ködn, de Ködn,
des rutschadte Ees.
Geds, huits mar a Daxi:
I dsoi jedn Breis.

Geds, huits ma mei Oide,
fülleicht dsads me ham.
Donn schlof i mein Rausch aus
und foi in an Dram.

De Oide is saua,
i legs iwas Gnia.
Se dsiag maran driwa,
i bin neama ba mia.

Heasd, Feadl, du Beidl:
des fageß i da nia.
Ge, ruaf mar a Daxi!
I ge saufn mid dia.